پکتیا کې د ۹ میلیونه افغانیو په لګښت د يوه کانال جوړولو چارې پیل شوې
(کابل ټکی کام، پنجشنبه، ۲۶ چنګاښ ۱۴۰۴):
د پکتیا ولایت د کرنې ریاست مسؤلین وایي چې د زرمت ولسوالۍ په کلالګو سیمه کې د یوه کارېز او ۵۷۰ مترو اوږد کانال د جوړولو چارې رسماً پیل شوې دي. یادې پروژې ته نږدې ۹ میلیونه افغانۍ ځانګړې شوې دي، چې د سیمه ییزو کروندګرو د اړتیاوو پر بنسټ تطبیقېږي.
د کرنې ریاست د معلوماتو له مخې، د دې پروژې له بشپړېدو وروسته به شاوخوا ۶۰۰ هکټاره کرنیزه ځمکه خړوبه شي، چې له امله به د بزګرانو تولیدات زیات او اقتصادي حالت یې پیاوړی شي.
مسوولین زیاتوي چې دا یوازې د پیل ګام دی، او د کرنې سکتور د پراختیا لپاره ورته نورې اسانتیاوې او بنسټیزې پروژې هم پلان شوې دي، څو کروندګر وکولای شي خپل حاصلات په ښه کیفیت بازار ته وړاندې کړي.
