کابل ټکی کام (شنبه، ۲۸ چنګاښ، ۱۴۰۴ل)
د افغاني سرې میاشتې سرپرست عمومي رئیس، ښاغلي شیخ الحدیث شهابالدین دلاور، د لا ښو او اغېزمنو خدمتونو وړاندې کولو په موخه د مرکزي دفتر له یو شمېر کارکوونکو سره وکتل.
کتنه کې ښاغلي دلاور کارکوونکو ته په خپلو دندو کې د صداقت، اخلاص او امانتدارۍ په اړه د سپارښتنو ترڅنګ ټینګار وکړ چې ټول کارکوونکي باید له خیانت او غفلت څخه ځان وساتي، ځکه زموږ دنده خلکو ته واقعي خدمت کول دي، نو هر يو بايد خپلې دندې ته ريښتینى، ژمن او مسئول پاتې شي.
نوموړي زیاته کړه، افغاني سره میاشت د هېواد په کچه د بې سرپرسته او اړمنو کورنیو د ملاتړ یو مهم ادرس دی، اړینه ده چې ټول کارکوونکي د خلکو ریښتینی خدمت وکړي.
په پای کې ښاغلي دلاور کارکوونکو ته ډاډ ورکړ چې د اړمنو او بې سرپرسته کورنیو د لاسنیوي برخه کې به ګډې هڅې کوي ځکه هغوی ته په خپل وخت د خدمتونو وړاندې کول د ټولو اسلامي او ملي مسئولیت دی.
