د فتحي او د ازادۍ په ورځ بايد موږ څه وکړو ؟ 

مفتي رشيد احمد انقيادي

دا چې ۲۴ د زمري د افغانستان اسلامي امارت د فتحي ورځ ده په دې ورځو کې د شريعت چې کومي غوښتني و موږ ته متوجه دي د هغو غوښتنو په لړ کې دا يو څو غوښتني ستاسو درانه حضور ته وړاندي کوم.الله ج دي موږ ټولو ته د شريعت د احکامو سره سم عمل کولو توفيق راکړي. آمين

 (۱) ددې شکر ادا کول حتی د شکرانې لپاره نوافل او ختمونه کول چې الله ج موږ په يو داسي فتحه او داسي نظام ونازولو چې هيڅ چا يې تصور نه سو کولای.

(۲) د افغانستان د ټولو سرحداتو د حفاظت ، د ټينګښت او مضبوطۍ لپاره د الله ج دربار ته خاصه توجه کول او د الله ج څخه په ډيره عاجزي غوښتنه کول.

(۳) هغه شهيدان، زخميان مجاهدين ټول هغه اولسي خلک چې زموږ سره يې په دې لاره کې هر رنګه قربانۍ ورکړې او د هغوی کورنی په خپلو خاصو دعاګانو کې یاد ساتل.

(۴) د شهيدانو کورنۍ، زخميانو او د سنګر په ګردو لړليو مجاهدينو د کورنيو مراعت کول او د هغوی مشکلاتو ته د خپل توان تر حده رسيدګي کول.

(۵)د شهيدانو، زخميانو کونډيانو او هغه خويندو (چې زموږ لپاره به يی خپل د غاړي زر خرڅول او مهمات به يې راته رانيول) ارمانونو پوره کول د هغوی سره خيانت نه کول.

(۶) ټول مجاهدين، اولس او د حکومتي ادارو مامورين بايد خپل تر منځ هر رنګه اختلافاتو ته د پای ټکی کښیږدي او تر هر رنګه شخصي منافعو تېر سي اسلام او وطن ته په اتفاق سره د لا ښه خدمت کولو عزم وکړي.

(۷) ملت او چارواکي او د افغانستان ټول وګړي بايد د ملک د ترقۍ او د امن د استحکام لپاره شپه او ورځ کار وکړي او هر يو خپل مسؤليت پکې ادا کړي.

(۸) د فتحي او د ازادۍ د ورځو د لمانځلو سره سره بايد موږ خپل د دين او وطن ټولو سرحداتو حفاظت ته ځانونه جوګه کړو په همدې سلسله هر هغه څوک چې د افغانستان د اسلامي نظام په وړاندي خنډ کيږي هغه که هر څوک وي او که په هر نامه وي، د هرې طبقې کسان بايد د هغو څخه خپله بې زاري اعلان کړو هغوی و خپل صف ته را وبولو که څوک نه راځي د هغوی سره د شريعت د احکامو سره سم چلند وکړو.

(۹)د فتحي او د ازادۍ د ورځي د لمانځلو لپاره د خوشحالۍ محفلونو او جشنونو جوړولو کې بايد دې ټکي ته ډير متوجه اوسو چې د شريعت خلاف کوم غير شرعي عمل را څخه ونسي چې هغه مو د شکر پر ځای د ناشکري او د الله ج د ناراضۍ سبب وګرځي هغه که هر عمل وي که لوئ وي او کوچنۍ د شريعت خلاف د ټولو اعمالو څخه بايد ځانونه وساتو خصوصا اولسي وګړو ته د تکلیف څخه بايد په جدي توګه ځان وساتو.

 (۱۰) د فتحي او د ازادۍ د ورځي په لمانځلو کې بايد خپل ځوان نسل او راتلونکي نسل ته خپل د وطن د نامتو مجاهدینو او نامتو مشرانو او د ازادۍ په لار کې د قربانیانو مکمل معلومات وړاندي کړو او د هغوی پر فکرونو داسي کار وکړو چې که هر هر څوک هر وخت افغانستان اشغالوي بايد دوی يې په مقابل مکمل آماده وي او د دفاع فکر يې په مغزو کې جوړ وي او د اسلام او وطن د دښمنانو د تبليغاتو تر تاثير لاندي را نسي.

(۱۱) د ازادۍ او د فتحي ورځي په لمانځلو کې بايد خپل د جهاد اصلي هدف ته ډير متوجه اوسو او په کوم عزم و اراده چې مو دا جهاد کړی دی بايد هغه عزم او اراده راسره قوي پاته وي او په دې لاره کې چې کومي کمزورياني راڅخه سوي وي هغه بايد اصلاح کړو او کوم فرصتونه مو چې ضايع کړي دي د هغوی پر ضايع کېدو پښيمانه سو او د لاسته راوړلو په لټه کې اوسو.

(۱۲) دا چې په عموم کې د جهاد هدف د الله ج د کلمې لوړوالی دی نو بايد د الله ج کلمه لوړه کړو او ټول مسلمانان پر ديني احکامو باندي خپله هم عمل وکړو او کورنۍ او ماتحت ته هم پر‌ ديني احکامو د عمل کولو امر وکړو او د شرعي احکامو د تحفظ او تبليغ(رسولو) لپاره خپل توان سره سم ګټور کوششونه او اقدامات وکړو.

(۱۳) دا چې الله ج موږ پر اسلامي شرعي احکامو باندي د ښه عمل کولو لپاره په يو مستقل آزاد افغانستان او په يو ازاد اسلامي نظام و نازولو نو که مو تر اوسه په دې لاره کې کومه کمزوري کړې وي بايد د اوس څخه بيا دا تعهد وکړو چې نور به خپل ژوند ټول د الله ج د شريعت داحکامو سره سم تېروو او د الله ج د دې راکړل سوي نعمت به ډېر قدر کوو د ناشکري او شکايتونو څخه به ځان ساتو ان شاء الله.