کابل ټکی کام (چهارشنبه، ۲۹ زمری، ۱۴۰۴ل)
د یمن د انصارالله اسلامي غورځنګ مشر “سید عبدالملک بدرالدین حوثي” د غزې د اوسېدونکو پر وړاندې د صهیونیستي ريژیم د یرغلونو او نسلوژنې په اړه سخت غبرګون ښودلی دی.
حوثي ویلي، په غزه کې د روانې بې سارې نسلوژنې پر وړاندې د اسلامي امت چوپتیا د جدي پوښتنې وړ ده او امت باید د خپلې دندې په ترسره کولو کې بې پروا پاتې نه شي.
نوموړي ټینګار کړی، چې د غزې د خلکو ملاتړ یو ديني او انساني مسؤولیت دی او که اسلامي نړۍ په دې ازمایښتي پړاو کې پاتې راشي تاریخ به یې پر وړاندې سختې پوښتنې راپورته کړي.
حوثي زیاته کړې، د یمن ملت به د هر ډول ستونزو او فشارونو باوجود د فلسطیني ولس ترڅنګ ولاړ وي او د اشغالګرو پر ضد به خپلې مبارزې ته دوام ورکوي.
