کابل ټکی کام (چهارشنبه، ۲۹ زمری، ۱۴۰۴ل)
د افغانستان اسلامي امارت د هرات ولایت د ترافیکي پېښې په تړاو د تسلیت په پیغام کې ویل شوي، چې تېر ماښام د بس موټر د ټکر او اورلګیدنې له امله لسګونه تنه هېوادوال شهیدان او ټپیان شوي دي.
اسلامي امارت د پېښې له امله ژوره خواشیني څرګنده کړې او د الله تعالی له دربار څخه یې د شهیدانو لپاره جنت الفردوس، ټپیانو ته عاجله شفا او د کورنیو لپاره جمیل صبر او جزیل اجر غوښتی دی.
همدارنګه په پیغام کې ټرانسپورتي مسؤلینو ته سپارښتنه شوې چې د پېښې دقیق معلومات هر څه ژر ترلاسه او د پېښې د سبب اړوند معلومات له خلکو سره شریک کړي، او زیاته شوې ده چې الله تعالی دې نور د هېوادوالو له مال او سر څخه حفاظت وکړي.
