افغان کډوال کولای شي پرته له دې چې خیبر پښتونخوا کې د کمیشنرۍ دفترونو ته مراجعه وکړي، خپل هېواد ته راستانه شي

کابل ټکی کام (چهارشنبه، ۲۹ زمری، ۱۴۰۴ل)

د مهاجرينو او راستنېدونکو چارو وزارت وایي، چې له ملګرو ملتونو د کډوالو عالي کمیشنرۍ (UNHCR) سره د وروستۍ ناستې په پایله کې پرېکړه شوې، چې افغان کډوال به له نن (چهارشنبه، د اګسټ ۲۰، ۲۰۲۵) څخه پرته له دې چې په خیبر پښتونخوا کې د یادې ادارې دفترونو ته مراجعه وکړي، هېواد ته راستانه شي.

د وزارت د معلوماتو له مخې، دغه پرېکړه د خیبر پښتونخوا د بېرته ستنېدنې مرکزونو کې د کډوالو د غوښتنو د زیاتوالي له امله شوې، څو د ستنېدنې بهیر اسانه او چټک شي.

کډوالو عالي کمیشنرۍ ډاډ ورکړی، چې په افغانستان کې به ټولو راستنېدونکو کډوالو ته پرته له توپیره یو شان ټاکل شوې مرستې ورکړل شي.