کابل ټکی کام (چهارشنبه، ۵ وږی، ۱۴۰۴ل)
د پاکستان پخواني لومړي وزیر او د دغه هېواد تر ټولو د ستر سیاسي ګوند تحریک انصاف زنداني مشر “عمران خان” په یوه لیک کې ویلي، چې په زوره د افغان کډوالو ایستل د اسلامي ارزښتونو او روایاتو خلاف عمل دی.
عمران خان ویلي:
“زه د افغان وروڼو د شړلو له امله شرمنده یم، هغوی باید نه وای ایستل شوي، دا د اسلامي روایاتو خلاف عمل دی.”
د نوموړي په وینا، افغانان د سختو حالاتو له امله پاکستان ته راغلي وو او د ورورولۍ او میلمستیا له مخې باید هغوی ته درناوی شوی وای، نه دا چې په زوره وشړل شي.
د یادونې وړ ده چې په دې وروستیو کې پاکستاني چارواکو د افغان کډوالو د ایستلو بهیر پیل کړی، چې له امله یې زرګونه افغان کډوال په سختو شرایطو کې بېرته خپل هېواد ته ستانه شوي او دا لړۍ لا هم روانه ده.
