کابل ټکی کام (پنجشنبه، ۶ وږی ۱۴۰۴):
د افغانستان اسلامي امارت د بهرنیو چارو وزارت د ننګرهار او خوست پر ولسي سیمو د پاکستاني پوځ د بریدونو په غبرگون کې، په کابل کې د پاکستان سفیر احضار او د افغانستان احتجاجليک يې ورسپارلی دی
تيره شپه پاکستاني پوځ د ننګرهار په شينوارو او د خوست په سپيرې ولسواليو کې د اولسي خلکو پر کورونو بریدونه وکړل چې په پایله کې ۳ تنه ملکيان شهيدان شوي او ۷ نور ټپیان شول.
د افغانستان اسلامي امارت د بهرنیوچارو وزارت د پاکستاني پوځ له خوا د افغانستان هوايي حریم نقض او ډیورنډ کرښې ته څېرمه پر ولسي وګړو بمباري په کلکو ټکو غندلې او د افغانستان د ځمکنۍ بشپړتيا صريح نقض او پاروونکې عمل يې بللی دی.
همداراز پاکستاني لوري ته په ډاګه شوې چې د افغانستان د حریم ساتنه د افغانستان اسلامي امارت ته سره کرښه ده او دغه ډول بېمسؤولیته کړنې به عواقب لري.
