کابل ټکی کام (یکشنبه، ۹ وږی، ۱۴۰۴ل)
د فلسطین د اسلامي مقاومت غورځنګ «حماس» په یوه بیان کې ویلي، چې د یمن د لومړي وزیر او نورو لوړپوړو چارواکو د شهادت له امله خپله ژوره خواشیني یمني ولس او حکومت سره شریکوي او د هغوی د قربانیو ستاينه کوي.
په بیان کې راغلي: «موږ د یمني شهیدانو د کورنیو او ولس سره خپله خواخوږي څرګندوو، هغوی چې د فلسطیني ملت او د غزې د مظلومې قضیې په ملاتړ کې تل ولاړ پاتې شول، او د همدې دریځ له امله یې قرباني ورکړه.»
حماس زیاته کړې، چې د یمن چارواکو له فلسطین سره د همدردۍ او ملاتړ تاریخ د مقاومت محور لپاره د ویاړ ځای دی او د دوی تګلاره به د امت د آزادۍ او عزت لپاره یوه لویه الهام بښونکې بیلګه پاتې شي.
دغه څرګندونې داسې مهال کېږي چې د تېرې پنجشنبې په ورځ پلازمېنه صنعا کې د صهیونیستي اشغالګرو په هوايي برید کې د یمن د لومړي وزیر په ګډون ۹ وزیران شهیدان او ګڼ نور ټپیان شول.
