د صهیونیسټي رژیم وحشتونه، د بې ګناه انسانانو وژنې، د ښځو او ماشومانو په نښه کول او د فلسطین د خاورې د اشغال دوام هغه دردناکه حقایق دي، چې هره ورځ د نړۍ د آزاد ضمیرونو سترګو ته وړاندې کېږي. خو د دې ټولو تر شا یوه ستره پوښتنه ولاړه ده: ولې د اسلامي نړۍ پراخ ظرفیتونه د فلسطین د قضیې په ملاتړ کې د عملي ګامونو په توګه نه کارول کېږي؟
که اسلامي نړۍ په رښتیني ډول د یووالي روحیه راژوندۍ کړي، درې مهم ګامونه د صهیونیسټي رژیم د ظلمونو د مهار لپاره اغېزناک واقع کېدای شي:
لومړی: د اقتصادي اړیکو پرېکون. هغه مهال چې د اسلامي هېوادونو شتمن بازارونه د صهیونیسټي رژیم او د هغه ملاتړو شرکتونو پر مخ وتړل شي، د هغوی د اقتصادي بنسټونو پر وړاندې ستر ګوزار دی. بایکاټ د ملتونو په لاس کې تر ټولو قوي وسله ده.
دوهم: د سیاسي اړیکو بشپړه قطع. د اسلامي نړۍ هر هغه هېواد چې د دغه رژیم سره اړیکې لري، په حقیقت کې د فلسطین د مظلوم ملت پر زخم مالګه شیندي. د دې اړیکو دوام نه یوازې د فلسطین د قضیې پر وړاندې خیانت دی، بلکې د اسلامي نړۍ د یووالي پر وړاندې ستر خنډ هم ګڼل کېږي.
دریم: د فلسطین ملت سره ګډ دریځ. تر هغه چې د ازاد فلسطین دولت جوړ شوی نه وي، اسلامي نړۍ باید په هر ډګر – اقتصادي، سیاسي او پوځي – کې د فلسطین ولس سره اوږه په اوږه ودریږي. د ګډو دفاعي او سیاسي ستراتیژیو اعلان کول، د صهیونیسټي رژیم پر وړاندې د یووالي حقیقي بڼه ده.
په حقیقت کې، د فلسطین ازادي یوازې د فلسطینیانو مسؤلیت نه دی، بلکې د ټولې اسلامي نړۍ د غیرت او وجدان آزموینه ده. که اسلامي امت د یووالي دغه درې ستنې په پوره اراده قائمې کړي، د صهیونیسټي رژیم ظلمونه نه یوازې مهار کېدای شي، بلکې د فلسطین د آزادۍ هيلې هم پوره کیدای شي.
