کابل ټکی کام (پنجشنبه، ۳ تله، ۱۴۰۴ل)
د صنعت او سوداګرۍ وزارت چارواکي وايي، د روان ۱۴۰۴ هـ.ش کال د لومړيو شپږو مياشتو په ترڅ کې د افغانستان د بهرنۍ سوداګرۍ کچه ۶ ميليارده او ۷۸۳ ميليونه ډالرو ته رسېدلې ده، چې د تېر کال د وروستيو شپږو مياشتو په پرتله پکې ۳۰ سلنه زياتوالی راغلی دی.
د وزارت په خبرپاڼه کې ويل شوي، چې سږ کال د وارداتو کچه ۹ سلنه او د صادراتو کچه ۲۱ سلنه لوړه شوې ده. د صادراتو په برخه کې اينځر، کشمش، پنبه، زردالو، زعفران، پسته، انګور او غيرالکولي مشروبات مهم توکي بلل شوي دي.
ياد توکي تر ډېره پاکستان، هند، متحده عربي اماراتو، قزاقستان، ترکيې، ايران، چين او عراق ته صادر شوي دي. وزارت وايي، د صادراتو د پراختيا لپاره هڅې روانې دي څو د افغانستان د سوداګرۍ کچه نوره هم لوړه شي.
