کابل ټکی کام (سه شنبه، ۱۵ تله، ۱۴۰۴ل)
د اسلامي امارت زعیم شيخ الحديث هبة اللّٰه اخندزاده د یو ځانګړي سیمینار د ګډونوالو ـ چې پکې د هېواد ټول والیان او ولسوالان شامل وو ـ په وینا کې مسؤلینو ته د اخلاص، تقوا او د خلکو د اصلاح سپارښتنه وکړه.
نوموړي وویل، هر مشر د خپل ولس لپاره امام دی او د هغه کړنې د خلکو په چلند اغېز لري، نو مشران دې د تقوا، عدالت او د رعیت د هوساینې لار خپله کړي.
ښاغلي هبة اللّٰه اخندزاده ټینګار وکړ، چې د امارت مسؤلین دې د الله د دین خدمت ته ژمن وي، خلکو ته دې د دین او شریعت پوهاوی ورکړي او د فساد او بېعدالتۍ مخه دې ونیسي. هغه د علماوو د درناوي او مشورو ارزښت یاد کړ او ویې ویل، د علماؤو په احترام او همکارۍ سره اسلامي نظام ټینګېږي.
نوموړي والیانو او ولسوالانو ته سپارښتنه وکړه، چې کار اهل ته وسپاري، له تحفو او رشوتونو ډډه وکړي، په خپلو منځونو کې یووالی وساتي، له غفلت او بېځایه مصروفیتونو ځان وساتي، او د ذکر، تلاوت او استغفار دوام وکړي، څو له شیطاني وسوسو خوندي پاتې شي.
