نن د اکتوبر اوومه د معاصر تاریخ هغه ورځ ده، چې د فلسطین د مقاومت ډلو د “اقصی طوفان” په نامه له اشغالګرو صهیونيستانو سره د مبارزې نوې پاڼه پرانیسته. له همدې ورځې دوه کاله تېرېږي، خو لا هم د دې جګړې اور بل دی او د نړۍ سیاسي نقشې ته یې ژور بدلون ورکړی دی.
د اقصی طوفان بریدونه د صهیونيستي رژیم د پوځ د نه ماتېدونکي ځواک د افسانې د نړېدو پیل و. په همدې ورځ نړۍ په خپلو سترګو ولیدل، چې د ټکنالوژۍ او وسلو پرمخ تللی رژیم د یو ولس د کلک عزم او مقاومت پر وړاندې څومره ناتوانه دی. له هغې ورځې را وروسته صهیونيستي پوځ د خپلو وحشيانه بریدونو له لارې هڅه وکړه د ماتې زور د فلسطین پر بې دفاع ولس وباسي، خو دغه وحشت د نړۍ وجدان راویښ کړ.
په تېرو دوو کلونو کې که څه هم د زرګونو فلسطینیانو ژوند قرباني شو، خو د دوی وینه د قضیې د بیا ژوندي کېدو او نړیوال مشروعیت د لا پراخېدو سبب شوه. نن ګڼ شمېر اروپايي هېوادونه فلسطین د خپلواک دولت په توګه په رسمیت پېژني. په ګڼ شمېر ښارونو کې د فلسطین په ملاتړ او د صهیونيستي رژیم پر ضد پراخ لاریونونه کېږي، چې دا د نړۍ د عامو خلکو د غوسې څرګندونه ده.
له بلې خوا، صهیونيستي رژیم چې تل یې ځان د لوېدیځ له نه ماتېدونکي ملاتړه برخمن باله، اوس د نړیوالې انزوا ښکار دی. د دوی د وحشت انځورونه د نړۍ د رسنیو د سرټکي ګرځېدلي، او هره ورځ د اشغال پر ضد د غږونو شدت زیاتېږي.
اقصی طوفان یوازې یوه ورځني برید ته نه ویل کېږي، بلکې دا د یوې اوږدې جګړې نوم دی چې له دوو کلونو راهیسې دوام لري. دا جګړه د فلسطیني ولس د ازادۍ، کرامت او بقا جګړه ده. پیغام یې دا دی چې د اشغال پر وړاندې مقاومت نه ستړې کېږي، او د قربانۍ هر څاڅکی وینه به د آزادۍ د بڼ د سمسورتيا لپاره اوبه شي.
