کابل ټکی کام (چهارشنبه، ۱۶ تله، ۱۴۰۴ل)
د امریکایي خبري وېبپاڼې اکسیوس د راپور له مخې، د غزې جګړې د پای ته رسولو په موخه روانې خبرې اترې اوس “تر ټولو نږدې پړاو ته رسېدلي دي.
راپور زیاتوي، چې د حماس، اسراییلو، ترکیې، قطر، مصر او امریکا استازي په وروستیو ورځو کې پر هغو جزئیاتو تمرکز کوي، چې له مخې به یې اوربند، د بندیانو تبادله او له غزې د اسراییلي ځواکونو د وتلو مهالوېش ټاکل کېږي.
د اکسیوس د سرچینو په وینا، که څه هم ځینې مهم موارد لا هم د توافق پړاو ته نه دي رسېدلي؛ خو د خبرو فضا مثبت بدلون کړی او ټول لوري د یوې عملي نتیجې تمه لري.
سرچینه زیاتوي، چې امریکا او قطر د دواړو خواوو ترمنځ د اعتماد فضا جوړولو هڅې زیاتې کړې دي، څو د اوږدمهاله اوربند او د غزې د بشري وضعیت د ښه کېدو زمینه برابره شي.
