کابل ټکی کام (پنجشنبه، ۱۷ تله، ۱۴۰۴ل)
د کډوالو په چارو کې د ملګرو ملتونو عالي کمېشنرۍ (یوایناېچسيار) د پاکستان هغه پرېکړه اندېښمنه بللې چې د ځينو کډوالۍ کمپونو قانوني وضعیت یې لغوه کړی او د افغانانو پر جبري ستنولو ټینګار لري.
یادې ادارې په یوه اعلامیه کې ویلي، دا ډول اقدامات جدي اندېښنې راپورته کوي او له اسلاماباده یې غوښتي چې د افغان کډوالو د بېرته ستنولو بهیر دې منظم، پړاویز، په خپله خوښه او د ډاډمن امنیت تر سیورې لاندې ترسره کړي.
د یوایناېچسيار په وینا، اوس مهال په پاکستان کې میلیونونه افغانان مېشت دي چې ډېری یې له څلورو لسیزو راهیسې هلته ژوند کوي او د هر ډول جبري ستنولو پرېکړه به د هغوی د حقونو او وضعیت پر وړاندې جدي ننګونې رامنځته کړي.
