کابل ټکی کام (پنجشنبه، ۱۷ تله، ۱۴۰۴ل)
د امريکا په واشنګټن کې د اسرائيل سفير ويلي، د حماس له لوري نيول شوي ژوندي بنديان به د روانې اوونۍ په پای، يعنې د يکشنبې يا دوشنبې په ورځ خوشې شي.
نوموړي د «اېپي» خبري اژانس ته ويلي، اسرائيل هيله لري چې دا موافقه د جګړې د پای سبب شي، خو دا به تر ډېره د تړون د سم پلي کېدو څرنګوالي پورې تړلې وي.
د ده په وينا، د سولې د موافقې لومړۍ مرحله بايد په راتلونکو څو ورځو کې په بشپړ ډول عملي شي، څو د باور فضا رامنځته او د دوامدارې سولې لپاره لاره هواره شي.
بلې خوا د حماس غورځنګ اعلان کړی چې د سولې د موافقې له مخې یې د فلسطيني بنديانو لېست د هغو معيارونو له مخې سپارلی چې دواړو لورو پرې سلا کړې ده.
حماس زياته کړې چې اوس د نوملړ وروستۍ موافقې ته انتظار باسي، څو د بنديانو د تبادلې بهير رسمي پيل شي.
حماس ټينګار کړی چې دا اقدام د سولې تړون د عملي کېدو په لړ کې يو مهم ګام دی او د اعتماد فضا د پياوړتيا سبب به شي.
