کابل ټکی کام (جمعه، ۱۸ تله، ۱۴۰۴ل)
د افغانستان د ملي دفاع وزارت وايي، پاکستان يو ځل بيا د افغانستان هوايي حريم نقض کړی او د ډېورند کرښې ته څېرمه د پکتیکا ولايت د مرغي په سيمه کې يې پر يوه ملکي بازار بمبار کړی دی. وزارت زياته کړې، د پاکستان جنګي الوتکو د کابل پلازمېنې فضا هم نقض کړې ده.
په خبرپاڼه کې راغلي، دا د افغانستان او پاکستان په تاريخ کې يو بېساری او له تشدد ډک اقدام دی، او د افغانستان پر خاوره دا ډول تجاوز کلک غندي. وزارت ټينګار کړی چې د هېواد له حريم څخه دفاع د افغانانو مشروع حق دی او که وضعيت ترینګلی شي، عواقب به یې د پاکستان پوځ پر غاړه وي.
تر دې وړاندې داسې راپورونه خپاره شول چې د پاکستان جنګي الوتکو په کابل او خوست کې هم اهداف په نښه کړي، خو د اسلامي امارت وياند مولوي ذبيحالله مجاهد تېره شپه تر پيښې وروسته ويلي و، د کابل په ښار کې يوازې د چاودنې غږ اورېدل شوی او د پېښې جزئيات تر څېړنې لاندې دي.
بل لور ته د پاکستان پوځ وياند جنرال احمد شريف ويلي، دوی هم د پېښې په اړه يوازې د ټولنيزو رسنيو له لارې خبر شوي دي.
له بلې خوا، داسې راپورونه ورکړل شوي چې د پاکستان د تحريک طالبان مشر مفتي نورولي محسود د دغه بمبار هدف و، خو وروسته په رسنيو کې خپور شوي ويډيوي پيغام کې هغه ته منسوب په يوه اډیو کليپ کې نوموړي څرګنده کړې چې دی د پاکستان په قبايلي سيمو کې دی او خوندي دی.
