کابل ټکی کام (جمعه، ۱۸ تله، ۱۴۰۴ل)
د تازه راپورونو له مخې، د حماس اسلامي غورځنګ او اسرائیلو ترمنځ تر اوربند وروسته صهیونیستي پوځیانو له غزې ښاره او څو نورو سیمو خپل ځواکونه ایستلي دي.
فلسطیني سرچینې وايي چې په تېره ورځ له رفح، خان یونس، شجاعیه، او د غزې ښار له ختیځو برخو څخه د اسرائیلي پوځیانو د وتلو بهیر لیدل شوی دی.
ویل کېږي، دا اقدام تر هغه وروسته ترسره کېږي، چې د نړیوالو فشارونو ترڅنګ د مقاومتو ډلو د اشغالګرو پر ضد شدید عملیات ترسره کړل او د اسرائیلو دننه هم د جګړې ضد اعتراضونه زیات شول.
د حماس یو ویاند ویلي، که د اوربند خبرې جدي بڼه غوره کړي، دا به د مقاومت بریا وي، ځکه اشغالګر ځواکونه له خپلو هدفونو پرته له غزې وځي.
بلخوا، اسرائیلي پوځ دا یوازې یو “موقتي شاتګ بللی؛ خو د سیمې څارونکي او د فلسطین خلک دا یو “روحي او نظامي ماتې” ګڼي.
د یادونې ده چې د غزې جګړه له تېرو ۲ کلونو راهیسې روانه وه او تر دې دمه یې زرګونه فلسطینیان شهیدان او ټپیان کړي؛ خو مقاومت لا هم خپل مورال له لاسه نه دی ورکړی.
