کابل ټکی کام (شنبه، ۱۹ تله، ۱۴۰۴ل)
د امریکا ولسمشر ډونالډ ټرمپ اعلان کړی چې د روان کال د نومبر له لومړۍ نېټې به امریکا ته پر واردېدونکو چینايي توکو ۱۰۰ سلنه ګمرکي تعرفه ولګول شي. نوموړي ویلي، دا پرېکړه د امریکا له لوري پر چین د فشارونو د زیاتولو یوه برخه ده او دا تعرفه به تر ټولو پخوانیو تعرفو لوړه وي.
ټرمپ په خپل ټولنیز شبکه «تروت سوشیال» کې لیکلي چې دا اقدام د امریکا د سوداګریزو ګټو د خوندي کولو لپاره شوی دی. د راپورونو له مخې، د ټرمپ له لوري پر یو شمېر نورو هېوادونو هم ګمرکي تعرفې لوړې شوې دي، چې موخه یې د امریکا تولیدي سکتور پیاوړی کول بلل شوی.
له دې اقدام وروسته د چین او هند ترمنځ اقتصادي اړیکې بېرته پراخې شوې دي او شنونکي دا د نړیوالې اقتصادي جګړې نوی پړاو ګڼي. په عین وخت کې، د ټرمپ له سیاستونو سره د مخالفت په پار د امریکا په ګڼو ښارونو کې د هغه پر ضد لاریونونه هم شوي دي.
