د بولدک روغتون مسوول: د پاکستاني پوځ له خوا توغول شويو مرمیو کې ۱۵ ملکيان شهیدان او تر ۷۰ زیات ټپیان دي
کابل ټکی کام (چهارشنبه، ۲۳ تله، ۱۴۰۴ل)
د راپورونو له مخې ، د کندهار ولایت د سپین بولدک ولسوالۍ د جګړې له امله درنه مرګژوبله رامنځته شوې ده.
د بولدک روغتون مسوول ډاکټر عطاجان بارک وایي، جګړه د شپې له څلورو بجو پیل شوې وه او د پاکستان له لوري توغول شويو مرمیو له کبله لږ تر لږه ۱۵ تنه ملکي وګړي شهیدان شوي او تر ۷۰ زیات نور ټپیان دي.
د ډاکټر بارک په وینا، په ټپیانو کې زیاتره ښځې او ماشومان شامل دي. هغه وايي، د سرسري ټپیانو درملنه په سیمهيیز روغتون کې روانه ده، خو عاجل ټپیان د کندهار میرویس روغتون ته لېږدول شوي دي.
تازه يوې سرچينې کابل ټکی کام ته ویلي، چې د شاوخوا اووه ساعتونو جګړې وروسته اوس مهال نښته درېدلې ده، خو لا هم د خالخال ډزو اوازونه اورېدل کېږي.
