کابل ټکی کام(چهارشنبه، ۳۰ تله، ۱۴۰۴ل)
د حماس اسلامي غورځنګ ویاند “حازم قاسم” ویلي، چې صهیونیستي اشغالګرو د اوربند د تړون په ماتولو کې قصدي تګلاره خپله کړې ده.
قاسم دا څرګندونې په یوه خپره کړې خبر پاڼه کې کړي او ټینګار یې کړی، چې حماس د اوربند د تړون ټول شرایط په بشپړ ډول مراعت کړي دي.
قاسم وویل، «حماس په ځانګړي ډول د لومړۍ مرحلې په ترڅ کې ټول ژوندي اسیران په یوه وار سپارلي دي» او څرګنده کړې یې ده، چې غورځنګ هره ورځ هڅه کوي څو د ټولو اسرایيلي اسیرانو مړي هم وسپاري؛ خو د جګړې د پراخو ویجاړیو له امله دا کار ډېر ستونزمن شوی دی.
د حازم په وینا له لویو ستونزو څخه یو دا دی چې د مړو د راوړلو او راایستلو لپاره درنې وسیلې او ماشینونه شتون نه لري او دا ستونزه حماس منځګړو ته هم څرګنده کړې ده.
هغه زیاته کړه، چې دغه غورځنګ د اوربند د سرغړونو په اړه په دوامداره توګه له منځګړو سره په تماس کې دی او همدارنګه له امریکایي اړخ سره هم د اشغالګرو د قصدي تېریو په اړه خبرې روانې دي.
قاسم همدارنګه وویل چې اشغالګر له مرستو د سیاسي فشار او باجاخیستنې لپاره کار اخلي او یو ځل بیا د لوږې ګواښونه کوي، چې دا وضعیت د ملکي خلکو د ستونزو د زیاتولو سبب ګرځي.
د حازم قاسم دا څرګندونې په داسې حال کې مخې ته راغلې، چې د سیمې او نړیوالو منځګړو له لوري د اوربند د دوام او د بشري مرستو د تضمین لپاره هڅې روانې دي.
حماس ټینګار کوي چې په تړون کې یې کړې ژمنې عملي کړي؛ خو د اشغالګرو له خوا د سرغړونو دوام د وضعیت د نورې پېچلتیا لامل ګرځېدلی دی.
