کابل ټکی کام (سه شنبه، ۱۳ لړم، ۱۴۰۴ل)
د کندهار ولایت په سپین بولدک ولسوالۍ کې د یو میلیارد افغانیو په لګښت د اته کیلومتره سړک د جوړولو او پراختیا چارې رسماً پیل شوې.
د سپین بولدک د ښاروالۍ د ښاري حکومتولۍ مدیر عبدالحنان جلالي وايي، دا سړک د مغاش کلا له سیمې څخه تر ډیورنډ فرضي کرښې پورې غځېدلی دی.
ښاغلي جلالي زیاته کړې، چې د یاد سړک د رغونې لګښت د ټولګټو چارو وزارت لهخوا برابریږي او د کار چارې به یې په یو کال کې بشپړې شي. نوموړي وویل، د دې پروژې له بشپړېدو سره به د خلکو د تګ راتګ اسانتیاوې زیاتې او د سیمهییز تجارت کچه لوړه شي.
