کابل ټکی کام (پنجشنبه، ۲۵مرغومی، ۱۳۹۹ل)
د پاکستاني رسنیو د راپورونو له مخې د ترکیې، پاکستان او اذربایجان د بهرنیو چارو وزیرانو په پلازمینه اسلام اباد کې د یوې درې اړخیزې ناستې پرمهال د همکاریو تړون لاسلیک کړی.
د اذربایجان د بهرنیو چارو وزارت د یوې خبرپاڼې په خپرولو سره ویلي، چې د یاد تړون له مخې به د پاکستان او ترکیې ساختماني شرکتونه د نګورنو قره باغ سیمه کې د هغو ودانیو په بیا جوړولو کې ونډه اخلي چې په دې وروستیو کې ارمنستان سره په جګړه کې ویجاړې شوې دي.
پاکستاني رسنیو د یاد تړون یو کاپي خپره کړې چې پکې راغلي: « ترکیه، پاکستان او اذربایجان به په سیاسي، امنیتي، اقتصادي او یو شمېر نورو برخو کې خپلو اړیکو ته لا پراختیا ورکوي».
د ترکیې او پاکستان د بهرنیو چارو وزیرانو اسلام اباد کې یوې ګډې خبري غونډې ته د وینا پرمهال ویلي، چې درې واړه هیوادونه د تړون په لاسلیک کولو خوښ دي او ترمینځ به یې اړیکې تر پخوا لا غښتلې شي.
