د ټرمپ او احمد الشرع ليدنه؛ له لسيزې ځنډ وروسته واشنګټن کې د سوريې سفارت ته د بیا پرانیستلو اجازه ورکړل شوه
کابل ټکی کام (سه شنبه، ۲۰لړم، ۱۴۰۴ل)
امريکا ويلي، چې سوريې ته به اجازه ورکړي څو په واشنګټن کې خپل سفارت بيا پرانيزي.
دا پرېکړه د دواړو هېوادونو د ولسمشرانو، ډونالډ ټرمپ او احمد الشرع، تر منځ د تاريخي ليدنې وروسته شوې ده — هغه ليدنه چې د نيمې پېړۍ په تېرېدو کې د امريکايي او سوري مشرانو تر منځ لومړۍ کتنه ګڼل کېږي.
دواړو لوريو د ترهګرۍ پر ضد همکارۍ، سيمهييز امنيت، اقتصادي همکارۍ او د غزې وضعيت په اړه خبرې او بحثونه کړي دي.
د امريکا د خزانې وزارت هممهاله د «قيصر قانون» له مخې اقتصادي بنديزونه پر سوريه د ۱۸۰ ورځو لپاره ځنډولي، او ويلي يې دي چې دا پرېکړه د بشري همکارۍ او سياسي نږدېوالي په موخه شوې ده.
د سوريې د انرژۍ وزير محمد البشير دغه اقدام «مثبت ګام» بللی او ويلي يې دي چې دا به د سوريې د خلکو د ژوند د اسانتيا او د نړيوالې همکارۍ د پياوړتيا لامل شي.
ولسمشر ټرمپ احمد الشرع «پياوړی او د سولې ملاتړی مشر» بللی او څرګنده کړې يې ده چې واشنګټن غواړي سوريه باثباته او بريالۍ شي.
له بلې خوا د دواړو هېوادونو د بهرنيو چارو وزيرانو د اړيکو د بيا پيل پر څرنګوالي خبرې کړې دي، او تمه ده چې د څو اونيو په موده کې د سوريې سفارت په واشنګټن کې په رسمي ډول پرانيستل شي — دا د يوولسو کلونو تر ډيپلوماټيک ځنډ وروسته د دواړو هېوادونو د نوې همکارۍ پيل ګڼل کېږي.
