د افغانستان او قزاقستان بهرنیو چارو وزیرانو د اړېکو پر پیاوړتیا او اقتصادي همکاریو خبرې کړي

کابل ټکی کام (سه شنبه، ۲۰ لړم، ۱۴۰۴ل)

د افغانستان اسلامي امارت د بهرنیو چارو وزیر مولوي امیرخان متقي د قزاقستان د بهرنیو چارو له وزیر ښاغلي “یرمیک کوشربایف” سره ټیلیفوني خبرې وکړې.

د ا.ا.ا د بهرنیو چارو وزارت په وینا، په دې خبرو کې دواړو لوریو د دوه اړخیزو اړیکو د لا پیاوړتیا، اقتصادي همکاریو د پراختیا او د سیمې د وروستیو حالاتو په اړه مفصل بحث وکړ.

مولوي متقي د افغانستان او قزاقستان ترمنځ د اقتصادي اړیکو د پراخېدو او د ګډو همکاریو د دوام هیله څرګنده کړه او د قزاقستان له خوا یې د افغان سوداګرو او محصلینو ملاتړ وستایه.

د قزاقستان د بهرنیو چارو وزیر هم د دواړو هېوادونو ترمنځ د همکاریو د پیاوړتیا ډاډ ورکړ او ویې ویل چې هېواد به یې له افغانستان سره په اقتصادي او تعلیمي برخو اړیکې نوره هم پراخې کړي.