هندي کشمير: د پولیس سټېشن دننه د بارودي موادو چاودنه؛ ۷ تنه وژل شوي او ۲۷ ټپیان دي

کابل ټکی کام (شنبه، ۲۴ لړم، ۱۴۰۴ل) ل

د هند تر ولکې لاندې کشمير سرينګر ښار په نوګام سیمه کې د پولیس سټېشن دننه د نيول شويو بارودي موادو لوی زېرمتون کې د چاودنې له امله لږ تر لږه اووه کسان وژل شوي او ۲۷ نور ټپیان شوي دي.

چارواکي وايي، د وژل شویو په ډله کې ډېری پولیس او د فرانزیک څانګې کارکوونکي شامل دي چې د بارودي موادو د معاینې پر مهال له چاودنې سره مخ شوي دي.

د روېټرز د راپور له مخې، د NDTV سرچینو ویلي چې په ټپیانو کې د پنځو کسانو حالت د اندېښنې وړ دی او د مرګ ژوبلې د زیاتېدو احتمال شته. د چاودنې له امله د پولیس سټېشن ودانۍ زيانمنه شوې او اور لګېدنه رامنځته شوې ده.

تر اوسه د چاودنې کره لامل نه دی څرګند شوی او د کشمیر پولیسو لا هم رسنیو ته رسمي معلومات نه دي ورکړي. دا پېښه په داسې حال کې رامنځته کېږي چې څلور ورځې وړاندې نوې ډېلي د یوې بمي حملې شاهد وه، چې په هغه کې لږ تر لږه اته کسان وژل شوي وو او هند حکومت هغه برید “ترهګریز” بللی و.