د سوډان جګړه؛ چټک ملاتړ ځواکونو پلازمېنه خرطوم کې پوځي الوتکه ویشتلې
کابل ټکی کام (پنجشنبه، ۲۹ لړم، ۱۴۰۴ل)
د سوډان د روانې کورنۍ جګړې په لړ کې د چټک غبرګون ځواکونو (RSF) ادعا کړې، چې پلازمېنه خرطوم کې یې د حکومتي ځواکونو یوه جنګي الوتکه ویشتلې ده.
د دغو ځواکونو یوه ویاند ویلي، چې دغه الوتکه د خرطوم په شمال کې وویشتل شوه، چې له امله یې بشپړه تباه او عمله یې وژل شوې ده.
بل لور ته، حکومتي چارواکو د پېښې پخلی نهدی کړی؛ خو سیمهيیزو سرچینو د الوتکې د نسکورېدو راپورونه تایید کړي دي.
دا پېښه په داسې حال کې کېږي، چې په دې وروستیو کې د چټک غبرګون ځواکونو او حکومتي پوځ ترمنځ جګړو زور اخیستی او دواړه لوري یو پر بل سخت بریدونه کوي.
د ملګرو ملتونو د بشري مرستو دفتر وایي، چې د سوډان شخړه لا هم د پراخېدلو په حال کې ده او تر اوسه یې زرګونه کسانو ته مرګژوبله اړولې او میلیونونه نور یې له بشري کړکېچ سره مخ کړي دي.
