کابل ټکی کام (شنبه، ۱ لیندۍ، ۱۴۰۴ل)
د امارتي شرکتونو لوی ریاست اړوند آریانا افغان هوايي شرکت مسؤولین وايي، ډېر ژر به د توکو د ټرانزیټ لپاره درې ځانګړې الوتکې وپېري، څو د صادراتو د لېږد بهیر لا چټک او اسانه شي.
د ياد شرکت رئیس بختالرحمن شرافت وایي، دغه الوتکې به د بوینګ یا ایربس ډوله وي او بیې یې له ۲۵ تر ۳۵ میلیونه امریکايي ډالرو اټکل شوې دي.
د شرکت په وینا، د نوو الوتکو په پېرلو سره به د توکو د لېږد لګښتونه د پام وړ کم شي او د ترانزیټ ظرفیت به په بې ساري ډول لوړ شي.
دغه اقدام به په ځانګړي ډول نړیوالو بازارونو ته د افغانستان د تازه او وچو مېوو د لېږد کچه زیاته کړي.
