پېښور کې پر ایف سي مرکز سرتيری او وسله وال بريد؛ ۳ ايف سي عسکر وژل شوي او دوه نور ټپیان
کابل ټکی کام (دوشنبه، ۳ لیندۍ، ۱۴۰۴ل)
د پاکستان د خېبر پښتونخوا پېښور کې د ایف سي پرېډ د هیډکواټر يا مرکزي قرارګاه پر اصلي دروازه زورور سرتيری برید شوی دی. د پېښې سره سم په سیمه کې د ډزو غږونه اورېدل شوي او امنیتي ځواکونو سیمه کلابنده کړې ده.
د پولیسو د معلوماتو له مخې، په لومړي سر کې سرتيري بریدګر خپل ځان الوزولی او وروسته دوه نور وسلهوال د هیډکواټر ودانۍ ته ننوتي او لا هم ډزې روانې دي.
چارواکي وايي، په برید کې د ایف سي درې سرتېري وژل شوي او دوه نور ټپیان شوي دي. ټپیان د پېښور لیډي ریډنګ روغتون ته انتقال شوي او په روغتون کې بیړنی حالت هم اعلان شوی دی.
سرچينې وايي، ممکن مرګ ژوبله تر دې هم زياته شي.
