ذبيح الله مجاهد: پاکستاني هوايي برید کې د یوې کورنۍ ۹ ماشومان او يوه ميرمن شهيدان شوي
کابل ټکی کام (سه شنبه، ۴ لیندۍ، ۱۴۰۴ل)
د افغانستان اسلامي امارت وياند مولوي ذبيح الله مجاهد وايي، تېره شپه د خوست ولایت ګربزو ولسوالۍ په مغلګۍ سیمه کې د پاکستان هوايي ځواکونو برید کړی چې د یوې کورنۍ لس غړي پکې شهيدان شوي دي.
ښاغلی مجاهد وايي، برید د ولایت خان ولد قاضي میر پر کور شوی او په کې ۹ ماشومان (۵ هلکان او ۴ انجونې) او یوه ښځه شهيدان شوي، او کور یې ټولټال ویجاړ شوی دی.
مجاهد زیاتوي، چې د خوست تر څنګ په کنړ او پکتیکا ولایتونو کې هم پاکستان جنګي الوتکو هوايي بریدونه کړي چې له امله یې څلور ملکیان ټپیان دي.
ښاغلي مجاهد په خپل اکس اکاونټ د شهيدانو کوچنيانو انځورونه هم خپاره کړي دي.
دغه هوایي بریدونه په داسې مهال ترسره کېږي، چې د افغانستان او پاکستان ترمنځ د څو اوونیو راهیسې اوربند روان و، خو د تازه بریدونو له امله دغه اوربند له منځه تللی دی.
