په اسلامکلا ګمرک کې نږدې ۱۰۰ ټنه قاچاقي او بېکیفیته تېل له منځه یوړل شول
کابل ټکی کام (شنبه، ۸ لیندۍ، ۱۴۰۴ل)
د مالیې وزارت وایي چې د هرات ولایت د اسلامکلا په سرحدي ګمرک کې نږدې ۱۰۰ ټنه قاچاقي او بېکیفیته پټرولو او ډیزلو تېلو د محکمې د حکم پر بنسټ له منځه یوړل شول.
وزارت زیاتوي، دغه مواد په بېلابېلو وختونو کې د قاچاق کوونکو له لوري په سوداګریزو موټرونو کې په پټه هېواد ته راوړل شوي وو، چې د ګمرک مسؤلینو له خوا ونیول شول. وروسته له لابراتواري معایناتو څخه څرګنده شوه چې تېل بېکیفیته او د استعمال لپاره مناسب نه دي، له همدې امله د تخریب پرېکړه وشوه.
د مالیې وزارت ټینګار کوي چې د هېواد په ټولو ګمرکونو کې سوداګریز توکي په دقیق ډول پلټل کېږي او هېڅ څوک نشي کولای ناقص، بېکیفیته یا ممنوعه توکي هېواد ته وارد یا له هېواده صادر کړي.
