کابل ټکی کام (چهارشنبه، ۱۲ لیندۍ، ۱۴۰۴ل)
د ریاستالوزراء د اقتصادي مرستیال ملا عبدالغني برادر اخوند په مشرۍ د ملي تدارکاتو کمېسیون غونډه کې ۳۰ پروژې وړاندې شوي وې چې د ارزونې وروسته کمېسیون د څه باندې ۱ میلیارد او ۵۳۸ میلیونو افغانیو په ارزښت ۱۱ پروژې منظورې کړې، په ۱۵ پروژو کې یې تعدیلات راوستل او د یوې پروژې قرارداد یې فسخ کړ، یوه پروژه بېرته اعاده شوه او دوې نورې د لا ډېرې ارزونې لپاره ځانګړو کمېټو ته وسپارل شوې.
اقتصادي معاونیت ليکي، چې په منظور شویو پروژو کې د تخار د یتیم تپې د تحکیماتو نهم لاټ، د غور د هوایي ډګر د ځغاستلیکې ترمیم، د کابل نړیوال هوايي ډګر د حفظ او مراقبت قراردادونه، د بغلان د دهنه غوري ۱۷ کیلومتره سړک، د پکتیکا د زرګرانو–ګردېز سړک، د سب سټیشنونو جوړول او د کابل موسهي ولسوالۍ ته د برېښنا رسونې پروژې شاملې دي.
همدارنګه د معدني وسایلو او موټرو پیرود او په باریکاب کې د ۲۲۰ کیلوولټه سب سټیشن د سروې او ډیزاین قراردادونه هم منظور شول.
ملي تدارکات وايي چې یادې پروژې د افغانستان اسلامي امارت له لوري تمویلېږي او د هوايي ډګرونو د خدمتونو ښهوالي، د برېښنا شبکې پراختیا او د لارو او سړکونو د رغونې په برخه کې د پام وړ اغېز لرلای شي.
