کابل ټکی کام (دوشنبه، ۸ مرغومي، ۱۴۰۴ل)
د فلسطین د اسلامي مقاومت غورځنګ “حماس” پوځي څانګې “القسام لېوا نن رسماً تایید کړه، چې د پوځي څانګې ویاند “ابو عبیده” روان کال د غزې جګړې پر مهال شهید شوی دی.
د حماس اسلامي غورځنګ د پوځي څانګې نوي ویاند چې د “ابوعبیده” په نامه یې معرفي کړی الجزیرې تلویزیوني شبکې سره په خپله لومړنۍ مرکه کې ویلي، چې ابوعبیده د فلسطیني مقاومت یوه مهمه، پېژندل شوې او تاثیر لرونکې څېره وه، چې د کلونو راهیسې یې د مقاومت پیغام نړیوالو ته رسولی و.
په ورته وخت کې د رویټرز خبري اژانس د راپور له مخې، حماس همداراز د دې غورځنګ د پخواني مشر او د یحیی سنوار د ورور “محمد سنوار” او څو نورو قوماندانانو شهادت هم تایید کړی دی.
د ویلو ده، چې ابوعبیده د غزې اړوند جبالیا کې زیږیدلی و، له ۲۰۰۴م کال څخه د حماس د نظامي څانګې ویاند و او په ۲۰۱۳م کال کې یې د غزې اسلامي پوهنتون کې د ماسټرۍ سند اخیستی و.
