کابل ټکی کام (چهارشنبه، ۱۰ مرغومي، ۱۴۰۴ل)
د یمن د انصارالله اسلامي غورځنګ مشر “سید عبدالملک بدرالدین حوثي د حماس اسلامي غورځنګ او د دې غورځنګ د پوځي څانګې “القسام لېوا” مشرتابه ته د تسلیت پیغام استولی، چې پکې یې د طوفانالاقصى جګړې او نورو وروستیو نښتو پر مهال د یادې ډلې د یو شمېر قوماندانانو شهادت ته اشاره کړې ده.
حوثي په خپل پیغام کې د القسام او حماس د مشرانو قربانۍ ستایلې او زیاته کړې یې ده، چې دغه مشران د اسراییلي یرغلګرو پر ضد د مستقیمو نښتو پر مهال شهیدان شوي دي.
نوموړي دا قربانۍ د فلسطین د قضيې دفاع او د ټول امت پر غاړه شرعي مسؤولیت بللی او ټینګار یې کړی، چې دا ډول سرښندنې به د سیمې په سیاسي او پوځي معادلاتو کې ژور بدلونونه راولي.
هغه یو ځل بیا د فلسطین له ولس، په ځانګړي ډول د غزې له اوسېدونکو سره د یمن ولس، وسله والو ځواکو او دولت د ملاتړ ډاډ ورکړی، چې دغه ملاتړ به د محاصرې او بریدونو سره سره دوام لري.
عبدالملک حوثي د خپل پیغام په پای کې اسلامي امت باندې غږ کړی، چې د فلسطین د قضيې په تړاو خپله دیني او انساني دنده پر ځای کړي.
