سنډيټایمز: د ایران په لاریونونو کې زرګونه لاریون کوونکي وژل شوي
کابل ټکی کام (یکشنبه، ۲۸ مرغومي، ۱۴۰۴ل)
سنډيټایمز ورځپاڼې راپور ور کړی، چې په ایران کې د ملي انقلاب په نوم دوه ورځنیو لاریونونو کې لږ تر لږه له ۱۶ زره او ۵۰۰ څخه تر ۱۸ زره پورې لاریونوال وژل شوي دي.
د راپور له مخې، په وژل شویو کې ماشومان او ښځې هم شاملې دي، او له ۳۳۰ زره څخه تر ۳۶۰ زره پورې نور کسان ټپیان شوي دي.
سنډيټایمز لیکلي، چې د دغو پېښو ډېری قربانیان له ۳۰ کلونو څخه کم عمر لري، چې دا چاره د بشري حقونو د جدي سرغړونو په اړه اندېښنې لا زیاتوي.
تر اوسه د ایران حکومت د یاد راپور په اړه رسمي غبرګون نه دی ښودلی؛ خو د ایران ستر مذهبي مشر ایات الله خامنه ای لاریونونو کې درنه مرګ ژوبله منلې که څه هم د کره شمېرو په اړه یې څه نه دي ویلي؛ خو لاریون کوونکي یې بلواګر، فتنه خپرونکي، د صهیونیستي ريژیم او امریکا لاس پوڅي بللي او ګواښ یې کړی که بیا ځلې دا ډول تېروتنه تکرار شي حکومت به یې تر دې هم په سخته مخنیوی وکړي.
