کابل ټکی کام (دوشنبه، ۴ کب، ۱۳۹۹ل)
د راپورونو له مخې د پاکستان د شمالي وزیرستان په میرعلي سیمه کې د يو بريد په ترڅ کې څلور ميرمنې وژل شوي او يو سړی ټپی دی.
د شمالي وزیرستان د پولیسو مشر رسنیو ته ویلي، چې وژل شوې ښځې د “سباون” په نوم د یوې غیر دولتي مرستندویه ادارې کارکوونکې وې او سیمې ته ښځو سره د مرستې کولو په هدف تللې وې خو په لاره کې د ناڅرګندو وسلوالو له خوا په ډزو وژل شوې دي.
نوموړی زیاته کړې چې په برید کې د سباون مرستندویه ادارې موټر چلونکی ټپي شوی دی.
باید وویل شي چې په دې وروستیو کې په شمالي وزیرستان او ورڅيرمه سیمه کې يو ځل بيا د هدفي بریدونو لړۍ تېزه شوې، چې ځايي خلک یې اندیښمن کړي او په حکومتي ځواکونو تور لګوي چې د امنیت په خوندي کولو کې پاتې راغلي.
