کابل ټکی کام (شنبه، ۴ سلواغه، ۱۴۰۴ل)
د حماس اسلامي غورځنګ لوړ پوړي مشر “غازي حمد” يو ځل بيا ټينګار کړی، چې د دوی غورځنګ به د مقاومت وسلې له ځانه سره وساتې او هېچا ته به یې تسلیم نه کړي.
نوموړي په يوه تازه مرکه کې ويلي:حماس د مقاومت پر وسله کلک ولاړ دی او «ان تر دې چې يوه تشه مرمۍ هم پاتې شي» خپله وسله به ونه سپاري. د هغه په وينا، دا وسله به تر هغې وساتل شي، څو چې اشغال بشپړ پای ته نه وي رسېدلی.
غازي حمد زياته کړې،چې د مقاومت وسله د فلسطيني ولس مشروع حق دی او دا د اشغال پر وړاندې د دفاع يوازينۍ لار ګڼل کېږي.
هغه وويل، هر ډول فشارونه او ګواښونه به د حماس د دريځ په بدلولو کې اغېز ونه لري.
د يادونې ده چې دا څرګندونې په داسې حال کې شوې دي، چې په سيمه کې سياسي او امنيتي وضعيت لا هم ترينګلی دی او د بېلابېلو لورو ترمنځ د اوربند او سياسي هوکړو په اړه هڅې روانې دي.
