سپاه پاسداران: د امریکا د بریدونو په غبرګون کې مو اته امریکایي پوځي هدفونه وویشتل

کابل ټکی کام (يکشنبه، ۸ چنګاښ، ۱۴۰۵ل)

د ایران سپاه پاسداران وايي، چې د امریکا د وروستیو بریدونو په غبرګون کې یې په کویټ او بحرین کې د امریکا پوځ اړوند پر اتو مهمو پوځي بنسټونو بریدونه کړي دي.

دغه ځواک همداراز ګواښ کړی، چې په راتلونکو ورځو کې به د سیمې امریکایي پوځي اډې له سختو بریدونو سره مخ شي.

سپاه پاسداران ویلي، چې د اوربند هر ډول سرغړونه به روان بهیر په بشپړ ډول ودروي او د هرمز تنګي په اړه به له هغو بېړیو سره چې د ایران لارښوونې نه مني، تر پخوا سخت چلند وشي. د دوی په وینا، د هرمز تنګي د سمندري تګ راتګ د کنټرول ترتیبات د ایران په واک کې دي.

یاد ځواک ټینګار کړی، چې د امریکا وروستی برید د ایران پر پنځو ساحلي سیمو ترسره شوی او د دوی وروستي پوځي عملیات د همدې برید په ځواب کې ترسره شوي دي.

 سپاه پاسداران خبرداری ورکړی، چې هر ډول نوی برید به له «سخت او پرېکنده» غبرګون سره مخ شي.