کابل ټکی کام (يکشنبه، ۵ سلواغه، ۱۴۰۴ل)
د امریکا جمهوررئیس ډونلډ ټرمپ کاناډا ته سخت خبرداری ورکړی چې که له چین سره شوې سوداګریزه هوکړه لغوه نه کړي، نو واشنګټن به پر کاناډایي وارداتو ۱۰۰ سلنه تعرفه ولګوي. ټرمپ ويلي چې د چین اقتصادي نفوذ به کاناډا کمزوری کړي او د دغه هېواد ټولنیز جوړښت به له منځه یوسي.
ټرمپ زیاته کړې: «چین به کاناډا ژوندۍ وخوري، په بشپړه توګه به یې اقتصاد او ټولنیز جوړښت له منځه یوسي.»
دا پداسې حال کې ده چې د کاناډا لومړي وزیر چین ته په تازه سفر کې د سوداګرۍ د پراختیا په موخه له دغه هېواد سره نوې هوکړه کړې ده. د دواړو هېوادونو ترمنځ د تجارتي اړیکو په اړه خبرې اوس هم روانې دي.
