کابل ټکی کام (يکشنبه، ۵ سلواغه، ۱۴۰۴ل)
د امریکا د کډوالۍ او ګمرکونو ادارې (ICE) ځواکونو په مېنیسوټا ایالت کې د روانو لاریونونو پر مهال یو کس په ډزو وژلی، تر دې وړاندې هم یوه ښځه د همدې ځواکونو له لوري وژل شوې وه. د دې پېښو له امله په بېلابېلو ایالتونو کې پراخ لاریونونه روان دي.
د مېنیسوټا چارواکو له ولسمشر ډونالډ ټرمپ غوښتي چې شاوخوا درې زره امنیتي ځواکونه بیرته وباسي او د وضعیت د لا ترینګلتیا مخه ونیسي.
ولسمشر ټرمپ د مېنیسوټا ښاروال (Mayor) جیکوب فراي او والي تیم والز د خپلو وروستیو څرګندونو له امله په “بغاوت هڅونې” تورن کړي. نوموړي ویلي چې د محلي پولیسو کمزوري فعالیت د فدرالي ځواکونو د ځان ساتنې اړتیا زیاته کړه.
ټرمپ همداراز په ایالت کې د پراخ مالي فساد او د غیرقانوني مهاجرت د زیاتوالي مسایل یاد کړي او ټینګار یې کړی چې د قانون ماتونکي به عدالت ته راکاږل شي.
