کابل ټکی کام (يکشنبه، ۵ سلواغه، ۱۴۰۴ل)
پاکستاني رسنیو راپور ورکړی چې د ۲۰۲۵–۲۰۲۶ مالي کال په لومړۍ نیمایي کې د دغه هېواد د ۹ ګاونډیو هېوادونو سره سوداګریز کسر ۷ اعشاریه ۶۸۳ میلیارده ډالرو ته رسېدلی، چې د تېر کال د همدې مودې په پرتله ۴۴ سلنه زیاتوالی ښيي.
ډان ورځپاڼې لیکلي چې د کسر دا چټک زیاتوالی تر ډېره د پاکستان د صادراتو د کمېدو له امله رامنځته شوی دی.
د راپور له مخې، چین، افغانستان او بنګلهدېش ته د پاکستان صادرات په څرګند ډول راکم شوي دي. احصایې ښيي چې افغانستان ته د پاکستان صادرات ۵۶ اعشاریه ۶۱ سلنه او له افغانستان څخه واردات هم ۳۶ اعشاریه ۷۵ سلنه کم شوي دي، چې دا د دواړو هېوادونو ترمنځ د سوداګریزو اړیکو د سړېدو نښه بلل کېږي.
اقتصادي شنونکي وایي، په پاکستان کې له سوداګرۍ څخه سیاسي استفاده د دې لامل شوې چې مهم تجارتي شریکان ورو ورو زړه توري شي او د بدیلو لارو په لټه کې شي.
