کابل ټکی کام (پنجشنبه، ۹ سلواغه، ۱۴۰۴ل)
د عامې روغتیا وزیر مولوي نور جلال جلالي د سرطاني ناروغیو د تشخیص او درملنې روغتون د پرانیستې مراسمو کې ویلي، په پلان کې لري چې په هېواد کې د ټولو هغو ناروغیو د تشخیص او درملنې لپاره ځانګړي روغتونونه جوړ کړي، چې اوس مهال د درملنې امکانات نه لري.
ښاغلي جلالي ویلي، په دې برخه کې هند او یو شمېر نورو هېوادونو د همکارۍ او مرستې ډاډ ورکړی دی.
نوموړي ټینګار وکړ چې د دغه پلان له مخې په لومړي ځل په هېواد کې د سرطاني ناروغیو د تشخیص او درملنې لپاره ځانګړی روغتون جوړ شو، چې د روغتیایي خدماتو د پراختیا په برخه کې یو مهم ګام ګڼل کېږي.
د عامې روغتیا وزارت د معلوماتو له مخې، د دغو پروژو موخه د ناروغانو د درملنې لګښتونه کمول، د هغوی ستونزې راکمول او په هېواد کې د تخصصي روغتیايي خدمتونو پیاوړتیا ده.
د دې روغتون پرانیستل د سرطاني ناروغیو د تشخیص او درملنې په برخه کې د هېواد لپاره لومړنی معیاري ملي خدمت بلل کېږي.
