ذبیح‌الله مجاهد: امنیت ټینګ شوی او میلیونونه کډوال راستانه شوي

کابل ټکی کام (جمعه، ۱۰ سلواغه، ۱۴۰۴ل)
د اسلامي امارت ویاند ذبیح‌الله مجاهد له «پیغام افغان» ټلویزیون سره په تازه مرکه کې ویلي، چې د تېر کال له پسرلي څخه تر دې مهاله څه باندې ۲.۸ میلیونه افغان کډوال بېرته هېواد ته راستانه شوي دي.
نوموړي زیاته کړې، چې اسلامي امارت هڅه کړې ده څو راستنېدونکو کډوالو ته د استوګنې، روغتیا، خوراکي توکو او نورو اړینو برخو کې لازمې اسانتیاوې برابرې کړي.
ذبیح‌الله مجاهد همداراز وویل، چې تېر کال له بې‌وزله، یتیمانو او معلولینو سره د ۱۲ میلیارده افغانیو په کچه نغدي مرستې شوې دي، چې دا د ټولنیز عدالت د پیاوړتیا په موخه ترسره شوې دي.
د نوموړي په وینا، د جزایي اصولنامې توشېح د قضایي چارو د لا ښه تنظیم لپاره شوې، او په دې سند کې شامل تعزیرات د اسلامي شریعت او حنفي فقې پر بنسټ ترتیب شوي دي.
هغه ټینګار وکړ، چې په هېواد کې داخلي امنیت پیاوړی دی او خلک له ډاډ سره تګ راتګ کوي. د بېلګې په توګه، د تېر لوی اختر پر مهال شاوخوا ۲ میلیونه کسانو بېلابېلو ولایتونو ته سفرونه کړي دي.
مجاهد زیاته کړه، چې له څلوېښتو کلونو وروسته افغانان په لومړي ځل له سراسري امنیت څخه برخمن شوي دي او دا مهال د اسلامي امارت تر ادارې لاندې ټولې سیمې خوندي دي.
نوموړي وویل، چې د اسلامي امارت په تشکیلاتي جوړښت کې نږدې ۱.۰۴ میلیونه دولتي کارکوونکي فعالیت کوي، چې شاوخوا ۸۰ سلنه یې پخواني مامورین دي.
هغه دا هم وویل، چې د اسلامي امارت په دننه کې هېڅ ډول اختلاف نشته او ټول د یو امیر تر مشرۍ لاندې د هېواد د ثبات او ابادۍ لپاره ګډ کار کوي.
د بهرنیو اړیکو په اړه، ذبیح‌الله مجاهد وویل، چې اسلامي امارت له ټولو هېوادونو، په ځانګړې توګه له امریکا سره، د متوازنو او مثبتو اړیکو غوښتونکی دی، او ښايي امریکا دې پایلې ته رسېدلې وي چې په افغانستان کې ډیپلوماټیک حضور د دوی په ګټه دی.
نوموړي په پای کې وویل، چې هغه کسان چې د جزایي اصولنامې پر وړاندې نیوکې کوي، د اسلامي مسایلو په برخه کې کافي معلومات نه لري.