کابل ټکی کام (شنبه، ۱۱ سلواغه، ۱۴۰۴ل)
د وال سټریټ ژورنال د راپور له مخې، امریکا په منځني ختیځ کې پراخ پوځي ځواکونه ځای پر ځای کړي چې د اړتیا په صورت کې د ایران پر ضد کارېدلی شي، او اوس ولسمشر ډونالډ ټرمپ باید پرېکړه وکړي چې دا ځواک څنګه وکاروي.
د امریکایي ادارې چارواکو ویلي چې بحثونه روان دي څو روښانه شي اصلي هدف به د ایران اټومي پروګرام وي، که د بالستیک توغندیو زېرمه، که د حکومت کمزوري کول، او که د دغو انتخابونو ګډه بڼه.
راپور زیاتوي چې ټرمپ له خپلو سلاکارانو د داسې چټکو او قاطع پوځي انتخابونو غوښتنه کړې چې امریکا اوږدې سیمهییزې جګړې ته راښکته نه کړي. چارواکي وايي د سپینې ماڼۍ لپاره غوره سناریو هغه ده چې پر ایران سخت فشار راولي څو د اټومي پروګرام په اړه د امریکا غوښتنو ته غاړه کېږدي.
په ورته وخت کې واشنګټن هڅه کوي د پوځي ګواښ له لارې تهران د ډیپلوماټیکو امتیازاتو ورکولو ته هم اړ کړي.
بل لور ته ایراني چارواکو ویلي چې د اټومي خبرو لپاره پرانیستي دي، خو ټینګار یې کړی چې امریکا باید پوځي ګواښونه بند کړي.
پوځي او ستراتېژیک کارپوهان خبرداری ورکوي چې د ایران موضوع د «چټک او پرېکنده» برید له لارې په اسانه نه حل کېږي، ځکه تهران لا هم د توغندیو او بېپیلوټه الوتکو له لارې د ځواب ویلو توان لري، او هر ډول پراخ برید ښايي د سیمې د لا زیاتې بېثباتۍ لامل شي.
