دوه فلسطیني ځوانان د یوه اسرائیلي له ټپي کولو وروسته ووژل شول

کابل ټکی کام ۰۵حمل/۱۳۰۵، سمسور ګیلاني
دوه فلسطیني ځوانان نن (پنجشنبه) په مرکز الخلیل کې د تل ارمیده سیمې سره څېرمه په جنوب کرانه باختري کې ووژل شول.
د فلسطین د مطبوعاتو مرکز د صهیونیستانو د ۲ ټلویزیون شبکې په حواله خبر ور کړی دی، چې یادو دوو ځوانانو یو صهیونیستي سرتېری د چاقو په مټ ټپي کړ، او بیا وروسته د پوځیانو له لورې په ډزو وویشتل شول، او ځای پر ځای ووژل شول.
د فلسطین د روغتیا وزارت هم د یادو دوو ځوانانو وژنه تأیید کړې ده، خو د دوی د هویت په اړه یې څه نه دي ویلي.
په ورته وخت کې د صهیونیستي رژیم پوځيانو پر نورو فلسطینیانو ډزې وکړې، چې تر څو دوی له یادو دوو وژل شویو فلسطیني ځوانانو سره مرسته ونه کړي، چې پر ځمکه باندې په وینو کې لت پت پراته وو.
صهیونیستانو دوی ته اجازه ور نه کړه، چې وژل شویو فلسطینیانو ته نږدې شي، خو د صهیونیستانو ټپي شوی سرتېری مخکې له مخکې روغتون ته وړل شوی وو.