اسرائیلي کابینې پر لوېدیځه غاړه د بشپړ واک ټینګولو نوې پرېکړه تصویب کړه
کابل ټکی کام (دوشنبه، ۲۰ سلواغه، ۱۴۰۴ل)
د اسرائیلو د کابینې نوې پرېکړې چې پر اشغال شوې لوېدیځې غاړې د واک پراخولو په موخه تصویب شوې، د فلسطینیانو او عربي هېوادونو سخت غبرګونونه راپارولي او تر ټولو خطرناک ګامونه بلل شوي دي.
په دغو پرېکړو کې د ځمکو د اسنادو افشا کول، په الخلیل او بیتلحم کې د ودانولو واکونه د اشغال ملکي ادارې ته سپارل، او په «A» او «B» سیمو کې د مېشت ځایونو پراخول شامل دي.
سیاسي څارونکي وایي، دا اقدامات د فلسطیني ځمکو د عملي نیولو او د اسرائیلي واک د ټینګښت هڅه ده، چې د اوسلو او الخلیل تړونونه بېاغېزې کوي او د فلسطیني ادارې راتلونکی رول له جدي ګواښ سره مخ کوي.
فلسطیني چارواکو او عربي هېوادونو خبرداری ورکړی چې دغه سیاستونه د سیمې امنیت او ثبات له خطر سره مخ کوي.
د حماس غورځنګ دا پرېکړې د لوېدیځې غاړې د فلسطیني شتون پر ضد خطرناک ګام بللی او د ملي یووالي او ګډ مقاومت غوښتنه یې کړې ده.
همداراز د مقاومت کمېټو ویلي، دا پرېکړې د فلسطیني ځمکو د بشپړ نیولو معنا لري او له فلسطیني مشرتابه یې غوښتي چې ملي لومړیتوبونه بیا وټاکي او د اشغال پر وړاندې جدي دریځ خپل کړي.
