کابل ټکی کام (دوشنبه، ۲۰ سلواغه، ۱۴۰۴ل)
د مالیې وزارت ویاند عبدالقیوم نصیر ویلي، د اسلامي امارت د پرېکړې له مخې سر له نن دوشنبې، د سلواغې شلمې نېټې، له پاکستانه د درملو واردات په بشپړ ډول بند شول او دا پرېکړه د هېواد په ټولو ګومرکونو کې عملي شوې ده.
ښاغلي نصير له سوداګرو غوښتي، چې له پاکستانه د درملو د واردولو پر ځای بدیلو لارو ته مخه کړي په وینا يې د شعبان المعظم میاشتې له یویشتمې نېټې سره سم، له پاکستان څخه د درملو د واردولو اجازه نه ورکول کېږي او د قاچاقي لارو د هر ډول توکو پر وارداتو به کلک څار او قانوني چلند کېږي.
مالیې وزارت یو ځل بیا ډاډ ورکړی، چې د درملو او نورو اړینو توکو واردوونکو ته به د بدیلو لارو په برخه کې اسانتیاوې برابرې شي. دا پرېکړه وروسته له هغې شوې، چې پاکستان له افغانستان سره خپله سوداګري بنده کړه او اسلامي امارت د سوداګریزې تکیې د کمولو لپاره پر بدیلو لارو کار پیل کړ.
