کابل ټکی کام (شنبه، ۲۵ سلواغه، ۱۴۰۴ل)
د جمعي امنیت تړون سازمان (CSTO) یو ځل بیا په افغانستان کې د نړیوالو توندلارو او ترهګرو ډلو د فعالیتونو له امله د سیمې پر امنیت اندېښنه څرګنده کړې ده.
د دغه سازمان د ګډو ځواکونو قوماندان “اندریې نیکولاوېچ” سردیوکوف ویلي، داسې ډلې شته چې ګاونډیو ته د ترهګرۍ د صادرولو وړتیا لري او دا چاره د سیمې ثبات او امنیت ته جدي ګواښ بلل کېږي.
نوموړي زیاته کړې چې د رادیکالو ایډیالوژیو خپرېدل او د نشهيي توکو قاچاق لا هم مهمې ننګونې دي.
بلخوا، د روسیې د ملي امنیت شورا منشي سرګیې شویګو ویلي، د افغانستان او تاجکستان ترمنځ د پولې وضعیت د سيایسټياو د ټولو غړو هېوادونو پر امنیت اغېز لري.
خو د اسلامي امارت ویاند “ذبیحالله مجاهد” دا اندېښنې بېځایه بللې دي.
نوموړي ویلي، د افغانستان او ګاونډیو هېوادونو ترمنځ په پولو کې کلک امنیتي تدابیر نیول شوي او له تاجکستاني لوري سره په دې برخه کې تفاهم موجود دی.
مجاهد زیاته کړې چې که څه هم پخوا دغه لارې د قاچاقبرو د تګ راتګ لپاره کارېدلې، خو اوس یې امنیت په مراتبو ښه شوی او همغږي زیاته شوې ده.
د هغه په وینا، د اندېښنو پر ځای باید مثبت تعامل ته پام وشي او سیمهییزه همکاري نوره هم پیاوړې شي. هغه ډاډ ورکړی چې د افغانستان له خاورې به هېچا ته زیان ونه رسېږي.
سيایسټياو په ۱۹۹۲م کال کې د تاشکند تړون له مخې رامنځته شو او اوس مهال روسیه، بېلاروس، ارمنستان، قزاقستان، قرغزستان او تاجکستان یې غړیتوب لري.
دا اندېښنې داسې مهال راپورته کېږي چې په وروستیو میاشتو کې د افغانستان او تاجکستان پولې ته نږدې سیمو کې امنیتي پېښې شوې دي.
په لږ تر لږه دوو بریدونو کې، چې ویل کېږي د افغانستان له خاورې ترسره شوي، پنځه د چین وګړي چې د تاجکستان په کانونو کې یې کار کاوه، وژل شوي وو.
د دغو پېښو وروسته تاجکستان له روسیې وغوښتل چې له افغانستان سره د خپلې پولې د ساتنې لپاره ورسره مرسته وکړي، خو کابل ویلي وو چې دا ډول پېښو کې داسې کړۍ لاس لري چې په سیمه کې د بېثباتۍ او د هېوادونو ترمنځ د بېباورۍ رامنځته کولو هڅه کوي.
