کابل ټکی کام (دوشنبه، ۲۷ سلواغه، ۱۴۰۴ل)
د افغانستان ملي دفاع وزارت د خپلو دفاعي ځواکونو لپاره نوی پوځي یونیفورم په رسمي ډول اعلان کړ.
د وزارت په تالار کې په همدې مناسبت جوړې شوې غونډه کې ویل شوي چې دا یونیفورم د کومانډو، سرحدي ځواک او ملي اسلامي اردو لپاره ټاکل شوی او د ځواکونو د نظم، انضباط او هویت د پیاوړتیا په موخه معرفي شوی دی.
د وسلوال پوځ لوی درستیز قاري محمد فصیح الدین فطرت وویل، یونیفورم د ځواکونو د یووالي او وحدت سمبول دی او هغه کسان چې په پوځ کې شاملېږي باید د هېواد د دفاع ژمنتیا خپل شعار وګرځوي او عسکري نظم په بشپړ ډول مراعت کړي.
