عمر عماد
بيګاه مې دهغه پاکستاني پټان متقاعد جنرال خبری اوريدلي چه غرور او کبر يي بصيرت ړوند کړې وو، او په پوره حماقت لګيا دی وايي زمونږ الوتکو ته نه کابل لري دی، نه قندهار، نه جلال آباد، لکه امريکا چه د وينزويلا د ولسشمر سره څه وکړل…
بيا مې د پاکستان د اطلاعاتو او فرهنګ وزير خبری اوريدلې چه د خپل حکومت په ظلم او جنايت، او د افغانانو په مادې کمزورئ شکر کاږي او وايي :
الحمد لله(!!!) افغانستان وسائل نه لري!
ددی دواړو د خبرو معنی دا شوه چه وايي: زمونږ سره پر افغانانو د تيري وسايل شته ، او هغوی دخپلی دفاع وسائل هم نه لري، تعرض خو لا پریږده!
نو د ځان سره می وويل چه
همدغه په مادي وسلو او وسیلو ولاړ غرور دی چه دعاصم منير او دهغه د ډلګئ بصريت يي د مځکنیو واقعیتونو د ليدلو او درک کولو، او ارزولو څخه محروم کړي دي، نو ځکه يي په افغاني حريم وار وار ظالمانه تيری وکړ.
خو اوس به يي پدی خبره سر خلاص شوی وي چه يوازي وسلي او وسائل هر څه نه کوي، بلکه جګړی په انګيزه ګټل کيږي، که نه اسرائيلو به په دوه کلن تيري کي د غزې په غازيانو بريالی شوی، او جګړه يي ګټلی وای.
هو، که د پاکستان سره مادي وسايل شته دی، خو افغانان بيا د خپل کور او کلي څخه ددفاع، او د ظلم او تيری په وړاندې د مقاومت په څپانده روحيه سنبال دي.
دا جګړه د وسائلو نه مخکی د ارادو جګړه ده، او افغانان پکي په ټوله معنی برلاسي دي، اوس چه دجګړي اور دهغه چا لمن ته رسيدلې چه بل کړی يي دی، نو ډير امکان شته چه هماغه په وسائلو مغروره د خپلو باروتو په لمبو کی وسوځيږي.
الله تعالی د مظلومانو مرستندوی او ساتونکی، او د کبر او کبرجن د ماڼئ ړنګوونکی دې.
( وسيعلم الذين ظلموا اي منقلب ينقلبون) ان شاء الله تعالی.
